1 Të tretën ditë, Estera u vesh me petkat e mbretëreshës, qëndroi në këmbë në tremen e pallatit mbretëror, brenda, përballë sallonit të mbretit. Ai rrinte në fronin e vet në mbledhjen e pallatit me fytyrë përballë derës.
2 Si e pa mbretëreshën Ester ashtu në këmbë, i pëlqeu syve të tij, e shtriu në drejtim të saj shkopin e artë mbretëror që e mbante në dorë. Ajo u afrua dhe e preku majën e shkopit të tij.
3 Atëherë mbreti i tha: “Çfarë dëshiron, mbretëreshë Ester? Cila është kërkesa jote? Nëse do të ma kërkosh edhe gjysmën e mbretërisë, do ta jap”.
4 Ajo iu përgjigj: “Po të lutem, nëse i pëlqen mbretit, eja sot tek unë ti bashkë me Amanin në gostinë që e kam bërë gati”.
5 Mbreti menjëherë urdhëroi: “Thirrene shpejt Amanin që t’i plotësohet dëshira Esterës”.
Kështu, pra, erdhën mbreti e Amani në gostinë që e kishte bërë gati mbretëresha.
6 Pasi mbreti kishte pirë verë, tha: “Çfarë kërkon, se ta dhashë! Cila është ajo gjë që e dëshiron? Qoftë edhe gjysma e mbretërisë sime, do të të jepet”.
7 Estera iu përgjigj: “Kërkesa ime dhe lutja është:
8 Nëse kam gjetur hir para mbretit e në qoftë se mbretit i pëlqen të ma kryejë çka kërkoj e të ma plotësojë lutjen time, ta ketë mirësinë mbreti e Amani e të vijnë në gosti që do t’ua bëj gati nesër e atëherë do t’i përgjigj mbretit për çka po më pyet”.
9 Atë ditë Amani doli shend e verë, por u hidhërua shumë, kur pa se Mardokeu që po rrinte në derën e pallatit jo vetëm se nuk u ngrit për ta përshëndetur me përulje, por as që luajti nga vendi ku kishte ndenjur.
10 Megjithatë u përmbajt. Kur shkoi në shtëpinë e vet, i bashkoi miqtë, e thirri edhe gruan e vet Zaresën
11 ua tregoi shkëlqimin e pasurive të veta, u foli për djemtë e vet të shumtë e për nderin e madh, në të cilin e kishte ngritur mbreti përmbi të gjithë oborrtarët dhe zyrtarët e mbretit.
12 E pas këtyre, shtoi: “Po edhe mbretëresha Ester s’thirri në gosti bashkë me mbretin askënd tjetër përveç meje. Tek ajo edhe nesër do të shkoj në banket bashkë me mbretin.
13 Por, megjithëse i kam të gjitha këto, më duket se nuk kam asgjë deri sa ta shikoj çifutin Mardoke duke ndenjur në derën e mbretit”.
14 I përgjigjën Zaresa, gruaja e tij, dhe miqtë e tjerë: “Jep urdhër të vihet një tra i gjatë, i lartë pesëdhjetë kute dhe nesër në mëngjes kërko prej mbretit që të varet në të Mardokeu, e kështu do të shkosh i kënaqur në gosti me mbretin”. Amanit i pëlqeu këshilla dhe urdhëroi të bëhet gati trau.