1 Pasi atë natë mbretit i kishte humbur gjumi, urdhëroi t’i sillej libri i Kujtimeve ose i Kronikave dhe të lexohej në praninë e tij.
2 Duke lexuar erdhën në një vend, ku ishte shkruar se si Mardokeu e kishte zbuluar pritën e dy eunukëve derëtarë, Bagatanit e Taresit, të cilët kishin dashur të vënë dorë në personin e mbretit Asuer.
3 Kur e dëgjoi këtë gjë mbreti, pyeti: “Për këtë besnikëri çfarë nderi dhe çmimi fitoi Mardokeu”? I përgjigjën shërbëtorët e oborrtarët e mbretit: “Nuk iu dha asnjëfarë shpërblimi”?
4 Menjëherë mbreti pyeti: “Kush është tani me shërbim në treme”? Pikërisht Amani kishte hyrë në tremen e jashtme të pallatit mbretëror që t’ia shtinte në shteg mbretit të urdhëronte që të varej Mardokeu në litarin e bërë gati për të.
5 Shërbëtorët i përgjigjën: “Amani qëndron në hyrje para derës”. Mbreti urdhëroi: “Le të hyjë”!
6 Kur Amani hyri, mbreti e pyeti: “Çfarë duhet t’i bëhet njeriut, të cilin mbreti dëshiron ta nderojë”? Amani duke menduar vetë me vete e duke e parë se mbreti askënd tjetër s’dëshiron ta nderojë përveç atë,
7 u përgjigj: “Njeriu, të cilin mbreti dëshiron ta nderojë,
8 duhet të vishet me petkat e mbretit, me të cilat ka qenë mbreti i veshur, të vihet në kalë që e kalëron mbreti, t’i vihet në kokë keza mbretërore
9 dhe i pari ndër prijësit e mbretit, ai më i shquari, ta veshë e t’ia marrë kalin për dore, të ecë nëpër rrugët e qytetit, të bërtasë e të thotë: “Ja, si veprohet me njeriun që mbreti dëshiron t’i japë nder”!
10 Mbreti i urdhëroi: “Shpejto, merre petkun e kalin dhe bëj si the me çifutin Mardoke, që është në derën mbretërore. Mirë, vërja mendjen të mos e lësh pa bërë asgjë prej atyre që the”!
11 Amani e mori petkun e kalin, e veshi Mardokeun, e vuri në kalë dhe shkonte para tij rrugës së qytetit duke bërtitur: “Shikoni se si nderohet njeriu që mbreti dëshiron t’i japë nder”!
12 Mardokeu u kthye në derën e pallatit mbretëror, kurse Amani shpejtoi të shkonte në shtëpinë e vet me kokë të mbuluar duke qarë.
13 I tregoi gruas së vet Zaresës dhe miqve gjithçka i kishte ngjarë. I përgjigjën të dijshmit me të cilët këshillohej edhe gruaja e tij: “Në qoftë se Mardokeu, para të cilit paske filluar të biesh poshtë, është çifut, jo vetëm se s’ke për ta mundur, por ta ka thyer qafën”.
14 Ndërkohë që këta ende po bisedonin, ia behën shërbëtorët e mbretit dhe e shtrënguan të shkonte shpejt në gostinë që e kishte përgatitur mbretëresha.