< Ps 145 Ps 147 >
Psalmet(Ps 146)
146

1

ALELUJA!
Lavdëroje, shpirti im, Zotin!

2 Do ta lavdëroj Zotin gjithë jetën time,
derisa të jem, Hyjit tim do t’i këndoj.

3 Mos e vini shpresën tuaj në princa,
në njeri që s’është i zoti të shpëtojë.

4 Njeriu jep shpirt e kthehet në dheun e vet,
brenda një dite humbasin synimet e tija.

5 I lumi ai që e ka ndihmën e Hyjit të Jakobit,
që e ka shpresën në Zotin, Hyjin e vet,

6 i cili krijoi qiellin e tokën,
detin e gjithçka është në ta,
që e mban besnikërinë për amshim,

7 që u jep të drejtën të nëpërkëmburve,
u jep ushqimin të uriturve.
Zoti i çliron robërit,

8 Zoti u jep dritën e syve të verbërve,
Zoti i ndreq të kërrusurit,
Zoti i do të drejtët,

9 Zoti i mbron ardhacakët,
u ndihmon bonjakëve e të vejave,
ndërsa mëkatarëve ua pështjellon udhët.

10 Zoti do të mbretërojë për jetë,
Hyji yt, o Sion,
nga breznia në brezni.



Fjala e Zotit